الموضوع: البارحة نومي على اكواع وكفوف

السلام عليكم ورحمة الله وبركاته

هذه رائعة من روائع الشاعر فرحان فالح الربيلي العنزي

اعجبتني صراحة وحبيت انقلها لكم آملاً ان تحوز على رضاكم

يقول :

البارحه نومي على اكواع وكفوف
وعن لذة المرقاد عيني عيوفه

يصدف لها عن لذة النوم صادوف
صادوفها قلبن كثيره اصدوفه

ان لف به في تالي الليل لافوف
ابعد كراها من اهمومن تلوفه

يطلع وينزل بي بعهنن من الصوف
عهنن تبلت كنة القيظ صوفه

مرات ياقف بي على شفه الخوف
في ماقفن كل الافاعي تحوفه

ومرات يمشي بي على درب معطوف
انهايته عن مابغيت معطوفه

ولادري يحصل ما يدور ورى نوف
والله يحده عن هوى نوف نوفه

راعي الجناح اللى من الريش منتوف
في ماقفن حلت عليه المروفه

إيلاف ولاف بلى ولف مالوف
إيلافها زاد الكلوفه كلوفه

بينت متخفي وخفيت مكشوف
وحذفت نص الاوله من حروفه

لا تاقع الشبهه على حروف بحروف
واقف بميقاف يكلف وقوفه

والي يدبر والي الاقدار مشيوف
لو ساعه المقسوم غير معروفه

ولا احد قضى معظم حياته بلا ضروف
ولا كل رجال يجاحد ضروفه

وانا جحدت اللي من المتن للجوف
جحدت جرح يجرح اللي يشوفه

والحذفه الي تلمس الجسم وتطوف
ما ظنتي نفسي عليها زهوفه

جحدتها لو جاتني مثلها الوف
مدام ماهي بالجبين محذوفه

ماني ضعيف اطرد ضعيفه ورى ضعوف
والفايته مالحق وراها حسوفه

من شان رجال مع الناس معروف
من شوفته تعرف بقايا وصوفه

يشوفه اللي فاقد الشوف مايشوف
ونوب المفتح ياصله مايشوفه

عليك عرفه يراع العرف لايطوف
وان ماعرفته معرفتك معيوفه

سميت من ياقف مع الحق ملقوف
ومن لا يعرفه وش تسمي صنوفه

جلسة خلا لو هي على راس شفشوف
اخير من مجلس تزانت ضعوفه

تمت ومايبقى النظر عنه مصروف
ونهاية الغزوه تسمى نكوفه

ولكم احترامي ،،،،،،،،،،،،،،،،،،

اشكرك يا سنيد على النقل هالقصيده

الله يعطيك العافيه ياعزيزي